حته

كان فى قصيده لعلى سلامه كان اسمها ناقص حته كان اولها بيقول كل ما اوزن الاقى لسه ناقصلى حته احط حته تقل حته اجيب قميص ابيع جاكته كل ماوزن الاقى ناقص اقول بناقص لو هيا حته على فكره دى حته من القصيده اللى غناها وجيه عزيزونقدر نقول ان ودى بقى نظرية الحته اللى موجوده فى حياة كل واحد منا انك تقعد عمرك كله تدور على الحته اللى ناقصه ولما تلاقى الحته تلاقى نفسك محتاج حته كمان عشان العمليه تكمل وان الحته اللى لقيتها لو سيفتها كده بطولها فى بارتيشن السى بتاع حياتك ملهاش لازمه من غير الحته الجديده اللى انت المفروض تدور عليها ودور بقى يا معلم على الحته الجديده ولو ربنا كرمك ولقيتها انا بقول ! لو ربنا كرمك (وابقى قابلنى) تلاقى نفسك محتاج حته اجدد ومحتاج ترقى النسخه بتاعة حياتك عشان تعرف تشغل الاوبشن بتاع الحته الاولانيه والحته الجديده وعيش بقى واقعد بقى لملم فى حتت ورقى فى نسخ وبكده الموضوع بقى عامل زى لعبة الاسنيك(الدوده) يعنى تاكل نقطه فى اخر الصفحه الا وتلاقى نقطه فى اعلى الصفحه والدوده تطول ..تطول لغاية ما الديل يلمس الراس وتأتى النهايه يا معلم ويجيلك اخر اسكريبت اللى تلاقى مكتوب فيه بحروف كبيره وعادة ما تكون الوان فجه قبيحه جيم اوفر يعنى ببساطه هتقعد تجيب فى حتت عشان تشغل حتت وتقعد تخرج من اسكريبت عشان تخش اسكريبت غيره وتفضل على الحال ده لغاية النهايه حد فاهم حاجه؟؟؟؟؟؟؟؟ انا عن نفسى مش فاهم طيب نقول ببساطه تانى ومن الاول ونحاول نشرح نظرية الحته تانى عارفين الفيلم بيتعمل ازاى او المسلسل بيبقى ازاى بيجى واحد لاسع ويقعد منكفأ على الورق عشان يعمل قصه بعد القصه لازم سيناريو وبعدين الموضوع يبقى عامل زى مقاول الانفار لتفريق الادوار ويشتغلو اوعى حد يكون فاهم ان الفيلم بيتصور مره واحده خبط لزء كده لااااا ده اسكريبتات مشاهد يعنى يخلصو اسكريبت يخشو على اسكريبت تانى لحد ما ييجى الاسكريبت الكبير اللى يبقى فيه الليله كلها واللى فيه تقدر تقطف حبات الحقيقه من عنقود الحياه الدراميه كلها واللى بيبقى فيه الحبكه الدراميه واللى بيوصل الحبكات بتاعة الاسكريبتات مع بعضها واللى لازم بأخره ينقفل الموضوع وتتفهم التيته وتبقى دى النهايه طب ليه وجع القلب ده؟ يعنى الحتت عشان تكتمل مش هتكتمل الا بالنهايه طب ايه اللازمه؟ وايه الفايده؟ وايه اللى غاصبنا؟ طالما ان الدوده كده كده ديلها هيخبط فى وشها والموضوع هيبقى جيم اوفر اقولك انا رأى الناس فى الموضوع ده ايه فى ناس من اللى هيا مخصصه فى موضوع الحتت ده كان ليها رأى كانت بتقول ان الحياه اصلا ملهاش لازمه لو انت معشتش عمرك كله تدور على حتت وايه فايدة الحياه لما يبقى تحت ايديك كل الحتت تعيش لبه اصلا؟ وفى نا س تانيه بتقول ان الحتت لازم تصنف تبعا للاولويات لو الحتت ضروريه يبقى لابد من تواجدها عند كل البنى ادمين اما لو الحتت كماليه يبقى تتواجد عند البنى ادمين اللى عندهم الرغبه فى تواجدها بس يعنى حسب الرغبه والقدره يعنى الناس اللى من الاخر يعنى طب ومين هيا الناس اللى من الاخر؟ اللى المفروض يبقى عندها كل الحتت الكماليه قبل الضروريه الناس اللى معاها فلوس ولا الناس اللى بقدرتها وذكائها واللى تقدر بمجودها تحصل على الحتت كلها طب هل الذكاء والقدره بس كافيين انك تنول شرف حصولك على كل الحتت؟ ولا لازم يبقى فيها محفزات وعوامل خارجيه اخرى زقه من فلان دفعه من فلان غير الفلان اللى فوق طب بلاش ده كله هل الناس اللى عندها كل الحتت هتسيب الناس تكافح عشان يبقو زيهم وعندهم كل الحتت روخرين؟ يعنى هل الناس اللى عندها كل الحتت هتسيب الناس اللى معندهاش حتت يبقو عندهم حتت روخرين يعنى الروس ممكن تتساوى ويبقى الجميع عنده كل الحتت يعنى هيبقى فى شرف فى الجيم ولا هيدفعو للحكم وساعتها طبعا الجماهير المحايده اللى هيا بتتفرج واللى هيا ميفرئش معاها انها تكون عندها حتت من اصله لا ضروريه ولا حتى كماليه هتصول وتجول وتثور وهتطلعلنا الشعارات بتاعة الصحافه فين اللى مش عارف ايه أهو وطبعا محدش هيعبرهم واللى عايزه الناس اللى عندها كل الحتت هو اللى يمشى طيب ايه الحل ؟ هنلاقيها منين ولا منين هنلاقيها من الحتت اللى مش كامله ولا هنلاقيها من الناس اللى عندها كل الحتت اللى مش عايزانا يبقى عندنا حتت اقلكم سيبكم من الموضوع ده كله لانه بقى شبه الحتت هيسلمنا من حته لحته تانيه وراه وفى الاخر مش بعيد نلاقى واحد فينا جاله اكتئاب من قلة الحتت الى ان نلتقى فى التكمله لو ان اصلا لقيت حته استخبى فيها اصل الظاهر الجيم اللى بلعب فيه اقرب يخلص وهلاقى الراجل بيلعبلى حواجبه ويقولى جيم اوفر يا معلمه خلصت الحدوته يا نجم حد عارف حته استخبى فيها بس تكون حته مش زى بقيت الحتت الى ان نلتقى

Perfect World

من وانا صغير وانا بحلم بالـ بيرفكت وورلد ده كنت شفت فيلم اسمه كده بتاع كيفين كوستنر كانت اجمل حاجه عجبتنى فى الفيلم انه لما جاب الواد على كرسى وراح رابطه فوق سقف العربيه وراح فاتح بالعربيه يا معلم واديله على 130 (نفس لقطة جعلتنى مجرما لما رشدى اباظه اللى هو احمد حلمى ربط غاده عادل) ساعتها الموضوع عجبنى اوى حتى انا فاكر انى اتحايلت على خالى الأقطاعى الوحيد فى عيلتنا اللى كان عنده عربيه انه يربطنى على سقف العربيه وطبعا ساعتها خالى قالى على امك يابن المجنونه ومن ساعتها تكون عندى مفهوم عن خالى انه رخم وارخم من الرخامه ذاتها

المهم الموضوع ده قعد شاغلنى فتره كبيره اوى وكان نفسى اعمله انى اتربط فوق سقف عربيه والعربيه تطير بيا ولما كبرت شويه وعرفت ان فى ناس اغبيا ممكن تحقق امنيتك بس تربطك فى العربيه سحل يا معلم وتجرجر فى اللى جابوك تعمدت ان انسى تلك الامنيه الغريبه لكن ظلت هناك بعض من بقايا ذلك الموضوع يطاردنى وصارت هناك فى عقلى الكثير من الأسئله اللاسعه التى كانت ممكن تودينى فى داهيه وفـ سكة اللى يروح ميرجعش زى هو ليه ربنا خلق الذباب ؟ بالراحه بس ومن غير تريئه ولا شتيمه حد فيكو يقولى عن فايده وحيده للذباب غير انه رخم ورزل وابن ستين كلب خد بالك ان سؤال الذباب الجوهرى هذا لم يأت من فراغ فقد سبقته اسئله وعلى حسب المراحل العمريه مثل هو ليه ربنا خلق الناس الوحشه ؟ هو ربنا مش عارف ان الناس الوحشه دى بتعمل حاجات وحشه فى الناس الحلوه (حاجات وحشه بالمفهوم الحسن والسئ كمان ) هو ربنا مخلئش ليه كل الناس اغنياء ؟ وليه فى فقرا ؟ هو ربنا مخلئش الناس صوتها زى فيروز ليه اظن انا الطفل الوحيد فى الوطن العربى اللى عشقت فيروز من وانا عندى خمس سنين ساعتها لما سمعت فيروز قلت لخالى اجمل جمله اتقالت على فيروز ومن ساعتها وانا بقول عليها نفس الجمله (يا خاله الست دى بتغنى بجد)المهم كل مرحله عمريه وكان لها فيض الأسئله التى كانت تقودنى الى علقه محترمه فى النهايه او يجاوبنى عن اسئلتى خالى الرخم اللى كان بيستوعب شطحات اسئلتى بصبر شديد لدرجة انى شايف ان كتابة الشعر بالنسبه ليا الأن ما هى الا شكر وتقديرا له لأنه كان من كتاب الشعر الجامدين اوى

المهم لما كبرت واتأكد الجميع انى طلعت شاب ملك ومؤسس للرخامه فى العيلة بطل خالى يجاوبنى عن اسئلتى وابتديت ادور لنفسى عن اجابات

لقيت فى النهايه ان كل الأسئله دى اجابتها واحده بالرغم من تعددها هو الرغبه فى العالم المثالى او البيرفيكت وورلد اللى انا قلتلكم عليه وفضل موضوع الربط على سقف العربيه ده حلم بيراودنى

ومن فتره صغيره وعلى الطريق الدائرى واستغلالا للفلتان الأمنى وعدم وجود شرطه تسحلنى بنفس العربيه واستغلالا ايضا لوجود صديق مجنون معايا عملت الموضوع ده.....اه عملته وقعدت على سقف عربيه وعملت فيها تايتنك وطارت يا معلم العربيه وابتدى السويط هو مكنش سويط ولا صراخ من الخوف ابدا والله هو كان صراخ من النشوى تخيل انك تصل بالمتعه الى حد النشوى

انا معاك انه جنون بس ايه المشكله ماله الجنون انا كنت كتبت وقلت فى كام بيت شعر

الموت جنون

رقصة خشوع فى قلب المجون

لحظة تأمل فى صمت السكون

ولما تموت تكتشف

ان كل اللى انت كنت فيه

وخايف عليه

هو الجنون

ان تصل برغباتك الى حد النشوى فأنت قد استوعبت من رغباتك كل شئ دى هيا القضيه

تخيل معايا انك فى عالم مثالى

عالم مفيهوش ذباب عالم مفيهوش عاطف بتاع الأنابيب كل يوم ييجى ويصحيك من اجدعها نومه عالم مفيهوش فارس بتاع الزباله ابن الجزمه اللى بييجى ياخد الزباله الساعه 7 صباحا وساعات قبل كده عالم مفيهوش اغنيا ولا فقرا عالم مفيهوش حزب وطنى ولا جمال مبارك ولا احمد عز عالم مفيهوش فتحى سرور ولا صفوت الشريف

ها يا معلم اتخيلت ... طب تمام نكبر بمستوى الخيال شويه ونفلسفه

تخيل معايا بعالم احلامك فيه واقع عالم الحب فيه هو العمله الرسميه القابله للصرف عالم كله فيروز وخد بالك من التخيل ده تحديدا تخيل عالم كله الاصوات فيه صوت فيروز يااااااااااااااااااه

ها يا معلم ايه الأخبار انت سرحت ولا ايه خليك معايا

فى النهايه فى حقيقه غايبه عنى وعنك الا وهى

انك لو مسمعتش شعبان عبد الرحيم وشفيقه عمرك مكنت هتحس بصوت فيروز

انك لو معشتش لحظة كره مش هتحس بقيمة الحب اللى بين ايديك

اانك لو مصحيتش كل يوم على صوت عاطف بتاع الانابيب او فارس بتاع الزباله مكنتش هتتمنى ان ييجى عليك يوم وتصحى على صوت عصفوره او او صوت فيروزى

هيا دى المشكله مش هتحس بقيمة الشئ الا اذا كنت قد شعرت بضده

ورغما عن ذلك

ورغما عن تلك الحقيقه المؤلمه

سأظل احلم بعالم مثالى

عالم رغباتك فيه تصل بك الى النشوى

سأظل احلم بعالم الأحلام ..................

ابراهيم فايز

اشمعنى انا

وادينى عملت مدونه
قلت اشمعنى انا ما الكل عامل مدونات ده مش بعيد يكون الواد ابنى بيتاجر فيهم دلوقتى
المهم اللى شار عليا بموضوع المدونه واحد صاحبى اسمه هيثم الكيلانى هو خبير شويه فى الموضوع ده
وان شاء الله خير
ومع اول تدوينه