الأحد، 26 يونيو، 2011

آدينى كتبت

معروف ليا على الاقل ان المدونه ما هى الى مكان لطرح الانفعالات الى تنتاب كل منا

يعنى وببساطه اللى نفسك فيه اكتبه .

اللى ييجى على بالك دونه.

المدونه بتاعتك يا كبير ومحدش ليه عندنا حاجه.

طيب انا ذنب امى ايه كقارئ اخش اقرا تدوينه تقولى فيها ان سيادتك مكتئب

طب متكتئب ولا حتى تنتحر انا مالى هو انا يعنى ناقص كأآبة اهلك

ولاَ واحد تانى كاتبلى بوست طويل عريض يقولى ان حبيبته خبطته مفك فى راسه

وراحت ماشيه مع واحد تانى صاحب

ه انا مال اهلى طب هيا غاويه مشى وضرب مفكات

وهو راجل قمع بكل ما فى الكلمه من معنى واسقاط

خلاص يعنى بقى موضوع حبيبته ده موضوع قومى

ولابد علينا ان يدلو كل منا بدلوه فى ذلك الموضوع الحيوى الخطير

اه انا متفق ان المدونه حتى وان وصلت للعالميه فهى فى الأصل مكان شخصى

وان القارئ يأت ليشارك صاحب المدونه فى انفعالاته واتجهاته الشخصيه

لكن وخد بالك من كلمة لكن دى

بلاش نشخصن المواضيع زياده على اللزوم

يعنى مينفعش السلفيين يبقو ماسكين فى خناء بتوع الجماعه الأسلاميه وعمالين يعايروا فى بعض

بتاع الجماعه يقول للسلفى انت قلت ان المظاهرات حرام

والتمرد على الحاكم يصل الى الكفر

يروح السلفى قايله طب ماانت قلت ان الانتخابات حرام

وان الذى لا يحكم بشرع الله كافر ولا يجوز مشاركته

اسيب انا الخناءه دى واقول ان البت زلابيا نتشت الواد حمص مفك ومشيت مع الواد كريم طب ازاى؟؟؟

وتقولى المدونه مكان شخصى

طب متتكلم انت عن الموضوع ده بانطباعك الشخصى

قول اللى جواك ومن غير زعل

قول ان كتير بئو افاقين

يفعلون اقصى ما فى وسعهم للأستفاده من الموقف

وكأن الأسلام اصبح يطبق مبادئ ميكافييلى والتى اهمها مبدأ ان الغايه تبرر الوسيله

قول متتكسفش هيشتموك على النت

هتلاقى من اللى بيرد عليك فى مدونتك

سلفى ولا جهادى ولا قطبى ولا انصار سنه ولا تبليغ ولا جماعه اسلاميه

نسيت حد اه الاخوان الاخت الكبرى معلش

يا نهار ابيض مخطط كل دى جماعات كل دول بيختلفو بينهم وبين بعضهم

كل دول متفقين فى الاصل مختلفين فى الفروع او على الاقل بعضها

طب ازاى عايزينا نتفق معاهم

ده على اساس انهم كبار بيغلطو فى بعض وانت ملكش دعوه بيهم وعليك تسمع الكلام وخلاص

طب ايه رأيك ان اهم صفه فى الكبير هى الثبات على الموقف

بتاع الجماعه الأسلاميه لما ظبط السادات على المنصه اللى هما كانو جهاد فى الأصل يعنى

قالو ساعتها ان السادات من الكفار

ولما عملو المراجعات سمعت بودنى والله كرم زهدى على الجزيره وهو بيقول على السادات نحسبه عند الله من

الشهداء ....شهداء مين يا عم الحاج

قالو عن مجلس الشعب والانتخابات انها مجالس كفريه لأنها لا تطبق شرع الله

وأنه لا يجوز شرعا المشاركه فى اطار يحكم يغير ما انزل الله

طب الحال ايه دلوئتى اشمعنى دلوئتى دانتو كنتو ماسكين الأخوان مجرسينها وفضحينها فضيحة المطاهر

(الا بالحق تطلع ايه فضيحة المطاهر دى)

كل شويه يقولو للأخوان انتى تشاركى فى تطبيق منهج لا يحكم بغير ما انزل الله

ازاى يا اخوان تشاركى فى سن قوانين ليست بالهيه

المهم انا لما ناقشت واحد منهم قالى انها محاوله لتطبيق حكم الله لما ينجحو يعنى

رديت انا وقلت تبقو عالم نصابين وولاد كلب لأن البرنامج اللى انتو اتقدمتو بيه مفيهوش الكلام ده

ده برنامج علمانى زيه زى برنامج نجيب ساويرس بتاع المصريين الأحرار ومفرئش كتير

يبقى الناخب لما يروح ينتخبكم على كده وانتو تيجو وتغيرو كده تبقو عالم نصابين وضحكتو علينا

مش كده ولا ايه؟؟َ!

طب السلفيين لما قالو ان المشاركه فى المظاهرات حرام وفتنه

وان التمرد على الحاكم حتى لو ظالم من الكبائر التى لا تجوز

ده حتى واحد صاحبى قالى فتوى غريبه اوى ليهم لا أعلم متى صدقها وعلى فكره حاولت تبيان صدقها لكنى فشلت

الفتوى دى مفادها اجازة التعذيب لضابط مباحث امن الدوله من اجل سلامة البلاد وأمنها

وعلى فكره انا صدئتها ليه

اللى شاف فيكم السلفى ابو جبل وهو عمال يقول ان العقيد فلان بتاع مباحث امن الدوله اتصل بيا اصله صديق والضابط

فلان قالى مش عارف ايه ده انا حسيت انه بيسهر معاهم يا جدع ده مش بعيد يكونو واخدين بعض على حب

المهم بعد ده كله قالو نستفاد من الموقف وهوب طلعو عايزين كامليا ومن وراها عبيرولسه مايسه وانجى ورحمه

وعدو بقى اسامى مهو اى بت هتلاقى نفسها فاضيه

هتروح عامله الحوار ده والشعب كله هيهتف بأسمها

وهوب عايزين يخشو الانتخابات وهو بقت صناديق الانتخابات من اولى اهتماماتهم

لدرجة انهم قالو عليها غزوة الصناديق

ايه يا جدعان يا جدعان عيب مش كده

اللى عاجبنى فى الموضوع ده بتوع التبليغ والدعوه عمالين يعملو مظاهرات برجوع مباحث امن الدوله عشان مش

عارفين هياخدو التصاريح اللى كانو بياخدوها من مين بعد كده

انا عارف انى ممكن اتهاجم بالمقال ده وعارف انه مش هيعجب ناس كتير ابويا نفسه لما اتناقش معايا قالى جملتين

كل جمله كلمتين اول جمله انت مغفل تانى جمله انت علمانى وختم الجملتين بكلمة كلب

بس احنا اتفقنا او انتو اللى فهمتونى ان المدونه دى بتاعتك

وان انا دافع ايجار ميت سنه قدام

حتى المهندس سيد قالى اكتب يا حسين

متسيبش حاجه الا لما تكتبها يا حسين

ده حويط يا حسين

حصل ولا محصلشى يا هندسه

وانت يا هيثم مش انت اللى قلتلى اكتب اللى انت حاسه واللى انت عايزه

ادينى كتبت

وقلت...........

قلت ان الناس دى مش تمام او فاكرينا احنا اللى مش تمام

قلت ان الناس دى بقى كل اللى يهمها مصلحة الجماعه

وحتى وان كانت المصلحه تختلف مع مصلحة الوطن فمصلحة الجماعه هى الاولى

قلت ان الناس بتشتغلنا وفاكرينا بلاليص جمع بلاص

والبلاص هذا موطنه الصعيد وهناك فئة من الناس يريدون تعميم البلاص على مدار ارض الوطن

ليصبح الجميع بلاليص

فمن هنا انادى

عزيزى البلاص

عزيزتى البلاصه

الناس دى عايزه تبلبصنا

متسمعوش لحد

متمشوش ورا حد

كونو بلاليص بمزاجكو مش عشان هما عايزينكو تبقو بلاليص

حد فاهم حاجه

لو عليا كالعاده مش فاهم

انتهى

مستنى الشتيمه

ابراهيم فايز

الجمعة، 24 يونيو، 2011

مش مهم

النهارده بقى معادنا مع قصيده
كتابة المقال بالنسبه ليا حاجه مستحدثه
اظن انى فى الأصل شاعر
نقرا مع بعض
وبعدين نتفاه
على فكره القصيده اسمها مش مهم ( مش مهم ده اسم القصيده اما مهم جدا اقول اسم القصيده)
عذبوها كمـمــوها
احرقوها مش مهم
اجلدوها ادبحــوها
خلوها تبقى بحر دم
بــرده مــش مـــهم
لا هّى هانت ولا هىّ كانت
فى يوم رخــيصه ابدا عـليـا
بس القضيه....
ان هى باقيه ساكنه فى عينيا
تعذبوها تجلـدوها
تحرقوها تدبحوها
مش مهم
والبدايه
البـدايه نقـطـه نقطـه
دم ينزل من عروقنا
نقطه نقطه
النهايه ضهر وطى
ضهر من تقل حمله
مال ووطى
دى البدايه ودى النهايه
نقطه نقطه وضهر وطى
والبدايه
البدايه عبيد وسوق
فى الـرقبـه طـوق
منه مشدودين
من ايد لأيد
قفص عريض
قضبان حديد
وراه مسجونين
بياع ينادى
ميـن يشتـرى ومـين يبـيع
جلاد وقاضى
خاين وضيع واحنا نضيع
وتبقى البدايه زى النهايه
صبايا..... سبايا
فى بيوتهم مباعين
والبدايه
البدايه
غصن اخضر
وشاب اسمر
عارى الكتاف
يزرع...يزهر
يخضر. يعمر
يملى الضفاف
النهايه
دود وسوس
طايح يدوس
توبه الجفاف
بومه زاعقه
فوق شجره ناشفه
منها تخاف
والبومه تزعق الفين سنه
وغراب ينوح على حقنا
والحق ضايع
فى ارض المطامع
والضحيه كلنا
فى النهايه
هتكون البدايه
زى النهايه
زى اللى فات
انين سكات
خريف ممات
انسان فتات
فايض لنا
تعذبوها ..تعذبونى
تجلدوها تجلدونى
تحرقوها تحرقونى
صدقونى مش مهم
مش مهم

ابراهيم فايز

الأحد، 19 يونيو، 2011

فين ابراهيم فايز

والله ما عارف

نفسى اكتب .... اكتب ايه والله ما عارف

وموضوع نفسى اكتب ده يرجع لأنى اولا والحمد لله بقيت من اصحاب المدونات الجامدين اوى واصبح لزاما عليا

الكتابه الشبه يوميه مهى لو مبئتش شبه يوميه الشعب يقول عليا ايه متواطؤ معاكم تانى حاجه مخليه نفسى فى الكتابه

حالة النشوى اللى بمر بيها النهارده وحالة النشوى دى سببها انى معايا فلوس انا والله لست بكائنا جشعا او ماديا

بس مش عارف ليه بحس براحه لما يكون فى جيبى فلوس وشرط تكون كتير

وبرده مش عايزين ننسى ان الفلوس دى ليها عامل مهم ده الواد ابنى بيحبنى زياده لما بيحس انى معايا فلوس

والواد مش عارف منين بيعرف ان معايا فلوس متئلش مركب قرون استشعار ان كان هو ولا امه

ولما الفلوس تخلص بقعد اهاتى ساعتين عشان كباية شاى وفى الاخر تروح مراتى متقمصه دور عبله كامل فى تمثلية

رايه وسكينه وتروح مبرئالى اروح قايم جرى وعامل كباية الشاى وطبعا انا مش بعمل الشاى خوف ولا حاجه لا يابابا

لا ده من باب المشاركه ليس الا

طب ماانا غبى لما فى كل مره بقوم اعملها (كباية الشاى مش حاجه تانيه)طب ما اجيب من الاخر واقوم اعملها (برده

كباية الشاى ومش حاجه تانيه )لازم يعنى اعمل فيها شيخ قبيله ماعلينا دوشتكم بموضوع ليس لكم دخل به وان كان

الساده المتزوجين منكم يشاركونى نفس الشعور المرير نخش بقى على الموضوع اللى انا عايز اكلمكم فيه

اللى حالا هخترعه واكلمكم فيه لأنه حاليا والله ما عارف اكلمكم فى ايه

اه بقولكم ايه انا هقلكم على حاجه مهمه انا نويت ارشح نفسى لانتخابات الرياسه

مهو مجتش عليا وبقى يييع وكخ دى سميه الخشاب بتاعة الريس عمر حرب بتاعة العربيه ناويه ترشح نفسها جت

عليا انا وهيبقى حرام ولا يجوز شرعا

مهو حاجه تجنن لما كان حسنى توريث لازء بـ اوهو (اوهو ده نوع غيره بيستعمله الناس العليوى اما اللى زى حالتنا

تمامهم الغيره الحصى) كان مفيش غير حسنى هو اللى يصلح انه يخرجنا من ام عنق الزجاجه اللى احنا محشورين في

امها ولما الزبون وقع بقت امة لا اله الا الله تصلح لتلك المهمه الحيويه الخطيره الا وهى اخراجنا من عنق ام الزجاجه

اللى احنا برده ما زلنا محشورين فى امها ايه امها دى - ايه اللغه البيئه اللى بئيت اتكلم بأمها دى

غصب عنى والله انا تعبت نقول ديكتاتوريه واللى هيتكلم هيتعمل فيه حاجات مش كويسه بمعناها الادبى والغير ادبى كمان

تلاقى الكل ماشى زى السكينه فى الحلاوه نقول حريه ومصر قبل 25 غير بعد 25 تلاقى اللى عاملى فيها ابراهيم

الابيض واللى عايش دور العاشرى واللى شايف نفسه انه لا يصلح انه يكون ابراهيم الابيض ولا عاشرى يقولك انا

ابقى رئيس جمهوريه وزى بعضه وخليها علينا الغريب فى الموضوع والمبكى ان كل من تقدم لمنصب الرئيس اراه لا

يصلح ولا اقلك نبدل كلمة (كل من تقدم ) مشيها معظم من تقدم لييجى واحد فيهم ينجح فى الانتخابات ويعرف باللى انا

كتبته يروح جايبنى ومنادى على فرج بتاع فيلم الكرنك

اصلها لما سميه الخشاب اللى كاوتش العربيه اشتكى من الهزهزه فى اللقطه اياها ترشح نفسها وتقولك انها متقدمه

ببرنامج قوى سيصلح من حال البلد اقول انا ايه غير تييييييييييييت

ولما البرادعى بتاع قلادة وسام النيل واللى كان بيتكلم عربى مكسرواللى مجاش مصر من ايام ماكان الجنيه بيجيب 2

كيلو لحمة ويتبقى تمشى بيه بكره وعايز يرشح نفسه اقول انا ايه غير تيييييييييييت

ولما عمرو موسى اللى كان شغال ضمن اكبر منظومة فساد عرفتها مصر فى التاريخ واللى ايامه حوصرت غزه

وانضربت ومعرفش يغير بيان جامعة الدول بل اضاف على نشجب وندين كلمة نستنكر يبقى اقول ايه غيرتييييييييت

ولما الشيخ حازم ابو اسماعيل مع كامل احترامى للسلفيين ليقطعولى ودنى ييجى ويقولك انا هرشح نفسى لرياسة دوله

وخد بالك من كلمة دولة مش رئاسة حى ولا حتى حاره وساعتها بقى يا معلم هنقعد طول السنه نقول عايزين كامليا

عايزين عبير يبقى اقول ايه انا غير تييييت

ولما ييجى مرتضى سيديهات قصدى منصور اللى معرفش يبقى رئيس نادى عايز يبقى رئيس دوله اقول انا ايه غير

تيييييت الا بالحق السته بتوع الزمالك كانو ايامه؟؟

سامع واحد بيقول هو مفيش حد عاجب اهلك ارد انا ده وانا متكئ على جنبى قادحا زناد فكرى لأ محدش عاجب اهلى

يا رجاله عيب دى مصر ولاده ولا جت فى موضوع الرياسه وخدت حبوب منع الحمل يعنى بقى دول رجالة مصر

بقى دول اللى ينفعو وغيرهم مفيش انا والله قربت اقتنع ان مكنش فى حد ينفع نائب لحسنى

فين الناس الحلوه --- فين ولاد مصر اللى بجد ----فين الدكتور حسن نافعه ---فين الدكتور ابو الغار--- فين الناس

دى وامثالهم ليه خدو جنب وارتضو الظل

فين الرجاله الحلوه اللى بجد دى

فين ابراهيم فايز اللى هو انا

فين ابو تريكه

انتهى

جيفارا

الخميس، 16 يونيو، 2011

بحبك ------- أكرهك

بين الحب والكره

خط فاصل لكنه طويل بعض الشئ

وان كان الحب يقف على احدى ضفتى النهر

فالكره يقف مستندا الى شجرة الجميز العجوز اللى على الناحيه التانيه

وبغض النظر عن هذا او ذاك

فهناك مقوله سمعتها فى فيلم بتاع مين مش عارف

ومين اللى قالها مش فاكر والله برده ما عارف

المهم ان المقوله بتقول

(لو بتدور على الاسباب علشان تكره بيها حد هتكرهه)

(ولو بتدور على اسباب عشان تحب بيها نفس الشخص برد هتلاقى)

يعنى ببساطه وامعانا فى القول انت اللى بتقدر تحدد ان كنت عايز تحب ولا عايز تكره

المهم انك تركز افكارك فى توجيه مشاعرك نحو الشخص الاخر

حد فاهم حاجه؟؟

لو عليا كالعاده مش فاهم

طب ندى مثال

طب ندى مثال يمكن افهم

لعل وعسى

ابوك مثلا

تملك ان تحبه لانه هو اللى رباك وصرف عليك

وكان بيديك فلوس تشترى بيها اللى انت عاوزه

وهو برده اللى بيحل المشاكل اللى انت بتقع فيها

من الاخر دايما فى ضهرك

ساندك ومقويك

وفى نفس الوقت انت تملك ان تكرهه

لانه هو اللى بيعاقبك لما بتغلط

وممكن يلطشك كام قلم كده على الماشى

وممكن يمنع عنك المصروف

وتبقى ماشى مع اصحابك شريد وحيد وجيوبك على الحديد

وهو برده اللى بتلاقيه هارش التيته وأآفش وقفة البلكونه لبنت الجيران

وميحلالوش المعايره بأنه هو اللى بيشترليك الأندر وير الا قدامها

مثال كمان

التعليم ان كنت فى المدرسه ولا فى الكليه اللى اتعلمت فيها لحد مبقيت حاجه

واذا ما كنتش لسه حاجه لحد دلوقتى

لازم اقلك معلش استحمل بكره هتبقى حاجه

احنا كلنا( اللى بقينا حاجه) بدأنا من الصفر

والحمد لله وصلنا اهو لصفر غير الصفر الاولانى وربنا يسهل

بس قول يارب

المهم انت ممكن تكره المدرسه او الكليه

ويبقى المدرس او الدكتور عامل زى الاشكيف اللى كان فى فوازير رمضان

فاكرينه اللى كان مع المناضله شريهان

لانك ياما انضربت فى المدرسه بسبب ومن غير سبب

وممكن برده يكون الدكتور اياها وقفك ومسح بكرامتك بلاط المدرج

والا بقى يا معلم لو حظك كان فى كلية تجاره ولا حقوق

هيبقى اللى شاف فضيحتك مئات ومش بعيد تلاقيها فى حصاد الاسبوع بتاع الجزيره

وومكن برده يكون الدكتور نفسه والمدرس ذاته قدوه ليك ومثال لطموحك

ده ان كنت من اصحاب الطموح اصلا

لانه علمك وفهمك ومن يعلمك حرفا لابد وان تصير له.......

(الشق التانى من ظرية فيثاغورث اللى بتلاقيها مكتوبه على كل حيطان المدرسه)

وغيره وغيره من العلاقات الكثيره

وغيره وغيره من الامثله

التى تضطرب فيها المشاعر مابين الحب والكره ما بين الابيض والاسود

اذن وخد بالك من النون بتاعة اذن دى

اذن يبقى علينا ان نحتفظ بالحب الابيض لحد ما ييجى اليوم الاسود

يعنى هل معنى كلامى ان اللى يكرتنى كف محترم على افايا ادوب فيه عشقا

لا مش قصدى كده

انا قصدى انك ساعتها متلبسكش روح الانتقام بتاعة انور وجدى فى فيلم حسن الهلالى

خد حقك بس بالمعقول يا معلم

بلاش تعملى فيها محمود المليجى

ويكون الشر والكره عندك هوايه

حد فاهم حاجه

لو عليا كالعاده

فهمت

بس هعمل نفسى مش فاهم

وشكرن

ومتاخدش بالك من النون دى اللى فى شكرن

الى ان نلتقى

الاثنين، 13 يونيو، 2011

دون كيشوت



من زمان اوى وانا عارف قصة دون كيشوت
حكاها ليا مدرس ابتدائى
لما حكاها كالعاده مفهمتش منه حاجه (العيب عندى مكنش عند المدرس)
كل اللى عرفته من المدرس ساعتها
ان كيشوت ده كان عايز يبقى فارس
كان عايز يدافع عن المظلومين
ولما لقى ان مفيش فايده
ملقاش قدامه غير طواحين الهوا يحاربها
كل يوم يخرج ومعاه سيفه ويقعد يحارب فى الطواحين
ويرجع اخر النهار عرقان وتعبان ومش قادر حتى يعمل الكابيتشينو بتاعه ويضربه قبل ما ينام
كان راضى عن نفسه ... عمل اللى عليه وحارب
كان كل يوم صاحبه يقول يا كيشون دى طواحين هوا فوق يا معلم مضحكش علينا المخاليق
يضحك كيشوت ويقوله انت ايه اللى عرفك ؟! ..دى مش طواحين دى فرسان وكائنات وحشه بتظلم الناس
دى كانت حكاية المدرس زى ما حكاها كتبتها
انا مش عارف ليه هو حكى ليا القصه دى
يمكن شاف انى لازم اعرف قصة كيشوت اكيد حس انى عيل عامل عشر عيال فى بعض
او انه القدر اللى خلى المدرس يحكيها لطفل عنده بالكتير 8 سنين عشان يفضل فاكرها بالرغم من تخطيه التلاتين
دورت على كيشوت
وبسهوله لقيته
انتو عارفين ؟
مفيش واحد على وجه الارض الا فيه من كيشوت
كأن كيشوت ده ورايا ورايا
ده رأيى كلنا فينا من كيشوت
كيشوت افتكر ان الفروسيه سهله او ببلاش وعاز يتمنظر قدام البت بتاعته
قالك ايه يعنى . الموضوع سهل وبسيت ..خوذة ورمح وفرس وسيف وبقيت فارس واى خدمه
كيشوت اتقاله ان عشان تبقى فارس لازم حد يديك الفروسيه
طب وايه يعنى برده هى دى يعنى اللى صعبه راح رايح لواحد كان شغال حرامى بعد الضهر
وقاله انا وقعت من السما وانت استلئتنى لتعملنى فارس لاموتلك نفسى واجيبلك مصيبه
كيشوت شاف ارض الواقع صعبه مؤلمه راح هربان منها الى الاحلام والجنون احيانا
كيشوت ما استحملش الظلم وبدل ما يحاربه قالك مابدهاش ..عليك يا معلم وعلى طواحين الهوا اهى غلبانه وبتستحمل
نرجع بقى للحته المهمه اللى قال عليها على سلامه فى قصيده من قصايده.. كان بيقول ايه؟
اه كان بيقول

قلت ابص فى المرايه يمكن اكون احلويت
فضلت داير ابص مخليتش ولا مرايه فى البيت
فى الحمام فى الاوضه او متعلق على الحيط
بصيت ..سكت شويه
وبعدين اتخضيت
معقول العمر ده كله زى ما رحت زى ماجيت

طيب حد يدور معايا على مرايه ويبص لنفسه
ها الكل جاهز المرايات فى ايديكم
بالله.. شايفين ايه؟
قولو متتكسفوش
اقول انا.... شايفين كيشوت
بس استنو مش معنى كده ان الدنيا خربت وان النور قطع ولم يبقى امامنا الا الاكتئاب ومن ثم الانتحار
لا
لسه فيه امل
ازاى؟
اقلكم
بس قبل منتكلم عن الأمل لازم نسأل نفسنا
هو كيشوت عمل كده ليه؟
ايه اللى خلاه يحارب طواحين الهوا
سامع واحد بيقول انه كان بيحارب طواحين الهوا على انها الناس الظلمه الوحشين
عارف عارف
مش ده قصدى
انا قصدى اشمعنى طواحين الهوا؟ ليه يعنى؟
ليه ببساطه مرحش حارب الظلمه مباشرة ليه استعوض طواحين الهوا عنهم؟
الاجابه
العجز
حينما تشعر انك لا تستطيع رفع الاذى عن نفسك فستصاب بالعج
ومن ثم اليأس ومن ثم الانتحار وساعتها يبقى ربنا كرمنا وارتحنا منك
كيشوت مرديش يخلى العجز يتملك منه قرر انه يخرج شحنته الانفعاليه ويحارب اى حاجه تقابله
اللى احنا بنقول عليه فى قاموسنا العامى (قصر ديل)
فعلا كيشوت كان ديله قصير ومعرفش يعمل راجل الا على الطواحين
طيب فى الحاله دى كيشوت كان صح؟ يحارب طواحين الهوا ولا يطق ويموت؟
وده السؤال الاول
الموضوع التانى
حالة الرضا اللى كانت بتصيب كيشوت بعد كل معركه مع الطواحين
رأى بيقول ان المعلم كيشوت كدب وصدق نفسه اخترع كدبه وبعد كده صدقها وقال انه بيعمل اللى عليه وبيحارب الطواحين
انك تكون فاكر انك بتعمل كل حاجه وانت مبتعملش حاجه خالص عارفين الشعور ده
اكيد كلكم مريتم بالتجربه دى تجربة الخواء
زى واحد قاعد بيذاكرمادة الترم الجى طول السنه وسايب مادة الترم ده
طيب يبقى هنا السؤال التانى
كيشوت كان غلطان؟
وقبل متجاوبو افتكرو انه فعلا مقدرش يحارب الظلم الحقيقى وان كان الظلم اكبر منه
وانه لو كان معملش كده كان زماننا بنطلع عليه الارافه برحمه ونور من الحسره واليأس
يبقى نحور السؤال شويه ونسئله بطريقه اكثر عمليه
برغم عدم مقدرة كيشوت على محاربة الظلم هل هذا يعفيه من جنونه؟
ويضعه فى جانب الفلاسفه والمفكرين
وده السؤال التانى
الموضوع التالت اللى هينبثق منه السؤال التالت مارا بمحورية الموضوع ككل
كان فيه امل من كيشوت انه يبطل الهبل ده وربنا يتوب عليه ويرجع يحارب الظلم
وهنا مربط الفرس بل مربط جميع حيوانات حديقة الحيوان
ليه؟
اقلكم
ناس قالت ان كيشوت مش هيقدر يحارب طواحين الهوا وذلك لانه خرج كل الكبت اللى عنده
فمفيش طاقه ولا غضب يقدر يحارب بيهم الظلم وكمان خلاص هو استسهل وبقت يدوب قدرت
ناس تانيه قالت انه خلاص قدرته بقت على اد الطواحين وده بقى اخره
وفيه ناس بقى بنت حلال وكلها امل قالت
يا جماعه كيشوت ناصح وبيجهز دفاعاته بيستعد يعنى وهتبقى سنة الظالمين مهببه ده لما يجهز يعنى
فى النهايه
فى ناس اعتبرت كيشوت ده بطل
وفى ناس تانيه اعتبرته هبل
وانا بصراح مش عارف اصنفه
دى هيا الحكايه