الأحد، 19 يونيو، 2011

فين ابراهيم فايز

والله ما عارف

نفسى اكتب .... اكتب ايه والله ما عارف

وموضوع نفسى اكتب ده يرجع لأنى اولا والحمد لله بقيت من اصحاب المدونات الجامدين اوى واصبح لزاما عليا

الكتابه الشبه يوميه مهى لو مبئتش شبه يوميه الشعب يقول عليا ايه متواطؤ معاكم تانى حاجه مخليه نفسى فى الكتابه

حالة النشوى اللى بمر بيها النهارده وحالة النشوى دى سببها انى معايا فلوس انا والله لست بكائنا جشعا او ماديا

بس مش عارف ليه بحس براحه لما يكون فى جيبى فلوس وشرط تكون كتير

وبرده مش عايزين ننسى ان الفلوس دى ليها عامل مهم ده الواد ابنى بيحبنى زياده لما بيحس انى معايا فلوس

والواد مش عارف منين بيعرف ان معايا فلوس متئلش مركب قرون استشعار ان كان هو ولا امه

ولما الفلوس تخلص بقعد اهاتى ساعتين عشان كباية شاى وفى الاخر تروح مراتى متقمصه دور عبله كامل فى تمثلية

رايه وسكينه وتروح مبرئالى اروح قايم جرى وعامل كباية الشاى وطبعا انا مش بعمل الشاى خوف ولا حاجه لا يابابا

لا ده من باب المشاركه ليس الا

طب ماانا غبى لما فى كل مره بقوم اعملها (كباية الشاى مش حاجه تانيه)طب ما اجيب من الاخر واقوم اعملها (برده

كباية الشاى ومش حاجه تانيه )لازم يعنى اعمل فيها شيخ قبيله ماعلينا دوشتكم بموضوع ليس لكم دخل به وان كان

الساده المتزوجين منكم يشاركونى نفس الشعور المرير نخش بقى على الموضوع اللى انا عايز اكلمكم فيه

اللى حالا هخترعه واكلمكم فيه لأنه حاليا والله ما عارف اكلمكم فى ايه

اه بقولكم ايه انا هقلكم على حاجه مهمه انا نويت ارشح نفسى لانتخابات الرياسه

مهو مجتش عليا وبقى يييع وكخ دى سميه الخشاب بتاعة الريس عمر حرب بتاعة العربيه ناويه ترشح نفسها جت

عليا انا وهيبقى حرام ولا يجوز شرعا

مهو حاجه تجنن لما كان حسنى توريث لازء بـ اوهو (اوهو ده نوع غيره بيستعمله الناس العليوى اما اللى زى حالتنا

تمامهم الغيره الحصى) كان مفيش غير حسنى هو اللى يصلح انه يخرجنا من ام عنق الزجاجه اللى احنا محشورين في

امها ولما الزبون وقع بقت امة لا اله الا الله تصلح لتلك المهمه الحيويه الخطيره الا وهى اخراجنا من عنق ام الزجاجه

اللى احنا برده ما زلنا محشورين فى امها ايه امها دى - ايه اللغه البيئه اللى بئيت اتكلم بأمها دى

غصب عنى والله انا تعبت نقول ديكتاتوريه واللى هيتكلم هيتعمل فيه حاجات مش كويسه بمعناها الادبى والغير ادبى كمان

تلاقى الكل ماشى زى السكينه فى الحلاوه نقول حريه ومصر قبل 25 غير بعد 25 تلاقى اللى عاملى فيها ابراهيم

الابيض واللى عايش دور العاشرى واللى شايف نفسه انه لا يصلح انه يكون ابراهيم الابيض ولا عاشرى يقولك انا

ابقى رئيس جمهوريه وزى بعضه وخليها علينا الغريب فى الموضوع والمبكى ان كل من تقدم لمنصب الرئيس اراه لا

يصلح ولا اقلك نبدل كلمة (كل من تقدم ) مشيها معظم من تقدم لييجى واحد فيهم ينجح فى الانتخابات ويعرف باللى انا

كتبته يروح جايبنى ومنادى على فرج بتاع فيلم الكرنك

اصلها لما سميه الخشاب اللى كاوتش العربيه اشتكى من الهزهزه فى اللقطه اياها ترشح نفسها وتقولك انها متقدمه

ببرنامج قوى سيصلح من حال البلد اقول انا ايه غير تييييييييييييت

ولما البرادعى بتاع قلادة وسام النيل واللى كان بيتكلم عربى مكسرواللى مجاش مصر من ايام ماكان الجنيه بيجيب 2

كيلو لحمة ويتبقى تمشى بيه بكره وعايز يرشح نفسه اقول انا ايه غير تيييييييييييت

ولما عمرو موسى اللى كان شغال ضمن اكبر منظومة فساد عرفتها مصر فى التاريخ واللى ايامه حوصرت غزه

وانضربت ومعرفش يغير بيان جامعة الدول بل اضاف على نشجب وندين كلمة نستنكر يبقى اقول ايه غيرتييييييييت

ولما الشيخ حازم ابو اسماعيل مع كامل احترامى للسلفيين ليقطعولى ودنى ييجى ويقولك انا هرشح نفسى لرياسة دوله

وخد بالك من كلمة دولة مش رئاسة حى ولا حتى حاره وساعتها بقى يا معلم هنقعد طول السنه نقول عايزين كامليا

عايزين عبير يبقى اقول ايه انا غير تييييت

ولما ييجى مرتضى سيديهات قصدى منصور اللى معرفش يبقى رئيس نادى عايز يبقى رئيس دوله اقول انا ايه غير

تيييييت الا بالحق السته بتوع الزمالك كانو ايامه؟؟

سامع واحد بيقول هو مفيش حد عاجب اهلك ارد انا ده وانا متكئ على جنبى قادحا زناد فكرى لأ محدش عاجب اهلى

يا رجاله عيب دى مصر ولاده ولا جت فى موضوع الرياسه وخدت حبوب منع الحمل يعنى بقى دول رجالة مصر

بقى دول اللى ينفعو وغيرهم مفيش انا والله قربت اقتنع ان مكنش فى حد ينفع نائب لحسنى

فين الناس الحلوه --- فين ولاد مصر اللى بجد ----فين الدكتور حسن نافعه ---فين الدكتور ابو الغار--- فين الناس

دى وامثالهم ليه خدو جنب وارتضو الظل

فين الرجاله الحلوه اللى بجد دى

فين ابراهيم فايز اللى هو انا

فين ابو تريكه

انتهى

جيفارا

هناك 16 تعليقًا:

  1. صلى على النبي ...عليه اصلاه والسلام
    موضوع أنك نفسك تكتب ومش عارف تكتب ايه دة عادى جدا
    لما واحد بيشترى كورة " العيال الصغيرين أقصد" أو الكبار لما مثلا بيوصولا انترنت لأول مرة
    بيفتحوا الجهاز عايزين يدخلوا على النت بقى ... بس مش عارفين يعملوا ايه المهم انهم عايزين يستفيدوا أى حاجة من النت ولا الأكورة اللى اشتروها
    الموضوع مش كدة خالص ......لما تحس بحاجة ...البوست بتاع الحاجة --- او لما تحس انك لقيت حتة " البوست بتاع الحتت"
    ساعتها أبقى أدخل دون
    مش كل يوم يعنى انت مش شغال ف جورنال
    وبعدين البوست اللى مابيطلعش م القلب ما بيوصلش للقلب

    ردحذف
  2. على فكرة أنا سبقتك بموضوع الرئاسه ده لكن خد بالك اننا لا تنطبق علينا الشروط
    لأن شرط الترشح ان عمرك يكون فوق الاربعين
    أنا جهزت الحملة الانتخابيه ....لكن للأسف أتصدمت

    نهارك سعيد يا معلم

    ردحذف
  3. زعلتنى يا هيثم والله
    يعنى انا مينفعش اترشح
    اهو ده عيبه
    بالنسبه للجمله الاخيره فى التعليق الاول
    وبعدين البوست اللى مابيطلعش م القلب ما بيوصلش للقلب
    قصدك تقول انها جلت منى المرادى وبوستى قصدى موضوعى مكنش من الفلب

    ردحذف
  4. لا على فكرة البوست دة اتكتب من القلب جدا لانك ماكنش عندك موضوع فقعد تفضفض

    لكن انا بتكلم على العموم
    ماتقلقش قدامنا بتاع 10 سنين نستعد فيهم سوا - مين عارف يمكن تضرب مع حد فينا
    خد بالك انا اخترت رمز الجمل - ياريت تختار حاجة تانيه
    هههههههههههههههه

    ردحذف
  5. والله عندك حق مصر ولادة واكيد فى ناس حلوة كتير ممكن مصر تستفاد بيهم كتير

    بوست مميز تسلم علية

    مع خالص تحياتى

    ردحذف
  6. يعنى لما كان عندك أزمة إقتصادية فى جيبك سقط نظام الحكم فى بيتك!! طب لما تبأة رئيس دولة و تقول شدوا الحزام الشعب هيعمل فيييييييييك إيه!!!؟
    بس الموضوع حلو يا أستاذ إبراهيم..و أنا معاك فى كل كلمة قلتها عن المترشحين للرئاسة.. بس مش معاك فى إختيار أبو الغار أو نافعه..أنا رأئى اللى يحكم مصر لازم يكون قائد عسكرى تااااااااانى عشان المصريين ما ينفعهمش غير القوة.. واللى دخل الجيش يعرف الكلام ده كويس.
    صلاح سالمان

    ردحذف
  7. على فكرة مش مهم تكتب بشكل يومي مش لازم المدون يكتب بشكل يومي
    المهم يكتب افكاره اللي هو حاسسها
    وحكاية انك مش لاقي حاجة تكتبها دي حاجة عادية بتجيلنا كلنا
    سردك جميل واسلوبك رائع
    تحياتي

    ردحذف
  8. اكتب يا حسين ... اكتب كل كلمة بيقولها ... وكل كلمة ما بيقولهاش ... ده حويط يا حسين ... دى مدونتك ... اكتب فيها اللى انت عايزه ... ومن خبرتى كبيرة ... اللى محصلتش فى عالم التدوين ... والتى تحدث بها القاصى والدانى ... انا اخدت قرار من زمان بأنى اكتب اللى انا عايزه ... معتقدا ان محدش هيقراه اساسا ... بدون مش اكتر ... وبالنسبة للرئاسة ... انا برشح روقة اللى كانت فى فيلم العار ... حقها ولا مش حقها ... حقها ابو كمال ... حقها اخويا

    ردحذف
  9. عندك حق يا ابوخليل ... مصر طول عمرها ولاّدة .. مش ولاّدة بنت المستكفى

    ما علينا .. لما نوشف آخرتها ايه

    تحياتى

    ردحذف
  10. ياه صلاح سالمان بيعلق عندك
    ده عمرة ماكتب كلمه فى مدونتى وأهوه بيقالى بقاله زمن

    ردحذف
  11. أخى الكريم : ابراهيم فايز
    تقبل مرورى وتقديرى واحترامى

    ردحذف
  12. صباح الورد يجفارا

    للأسف مازال جميع المتقدمين لمنصب الرئيس أقل

    بكثير مما يطمح المصريون ويا خوفي تفوز الست

    سمية بالمنصب ساعتها بجد راح تقلب السياسة

    المصرية لمسلسل درامي وفي بعض نواحيه كوميدي

    وفي نهايته تراجيدي فأين الرجال الحقيقية الذين

    أمتلأت بهم مصر فكيف سمحوا لمثل هذا أو تلك بأن

    يتصدروا الواجهة السياسية لبلد كبير مثل مصر ؟

    أتمنى في حال لم يتقدم غير هاؤلاء بأن يأخذ

    الرئاسة من يخاف الله في 80 مليون مصري ..

    تحياتي

    ردحذف
  13. اكتب اللي بتحص بيه ومش شرط يكون منظم ومنسق او في هيئة خاطرة المهم تعبر عن اللي جواكي ومتسكتش
    تحياتي ياصديقي

    ردحذف
  14. لو انى اعرف ان البحر عميق جدا ما ابحرت
    انا مش مصدء نفسى
    والله ممصدء نفسى
    كل دى ردود
    كل دى ناس بتقرا
    انا مدوناتى قديم من 2007
    كنت اكتب البوست واقعد اقرا فيه بدل المره ميه
    ولما محدش يعبرنى بتفه حتى مش برد
    اخش انا وارد على نفسى وبما ان عيب ان اسيب نفسى من غير رد فكنت اكيد لازم ارد عليها وكده يعنى
    حتى يتملكنى اليأس
    الا المرادى حاسس ان الموضوع جميل جدا
    لأول مره حد يعبر اهلى
    فى النهايه اشكر الجميع بالاسم
    كل باسمه
    واعدكم ببذل الجهد بس مش اوى يعنى
    شكرا ليكم كلكم

    ردحذف
  15. انا عندى احساس ان فى 85 مليون مواطن ح يرشحوا نفسهم فى الانتخابات الرئاسيه
    ياللا بالشفااااااااااا
    وبالتوفيق اتكل على الله ورشح نفسك وانا مش ح اديك صوتى انا ح صوت لنفسى هاهاهاهاهاهاهاهاها

    شكرا لزيارتك لمدونتى واقبل مرورى وصداقتى
    على فكره مدونتك حلوووووووه

    ردحذف
  16. *(محمد حجازي):ـ
    والله يا هيما رأيك جميل ويستحق التقدير بس ياريت حـــد يـــســـمــــع منــــهم عشان خاطر مصر

    ردحذف