الجمعة، 24 يونيو، 2011

مش مهم

النهارده بقى معادنا مع قصيده
كتابة المقال بالنسبه ليا حاجه مستحدثه
اظن انى فى الأصل شاعر
نقرا مع بعض
وبعدين نتفاه
على فكره القصيده اسمها مش مهم ( مش مهم ده اسم القصيده اما مهم جدا اقول اسم القصيده)
عذبوها كمـمــوها
احرقوها مش مهم
اجلدوها ادبحــوها
خلوها تبقى بحر دم
بــرده مــش مـــهم
لا هّى هانت ولا هىّ كانت
فى يوم رخــيصه ابدا عـليـا
بس القضيه....
ان هى باقيه ساكنه فى عينيا
تعذبوها تجلـدوها
تحرقوها تدبحوها
مش مهم
والبدايه
البـدايه نقـطـه نقطـه
دم ينزل من عروقنا
نقطه نقطه
النهايه ضهر وطى
ضهر من تقل حمله
مال ووطى
دى البدايه ودى النهايه
نقطه نقطه وضهر وطى
والبدايه
البدايه عبيد وسوق
فى الـرقبـه طـوق
منه مشدودين
من ايد لأيد
قفص عريض
قضبان حديد
وراه مسجونين
بياع ينادى
ميـن يشتـرى ومـين يبـيع
جلاد وقاضى
خاين وضيع واحنا نضيع
وتبقى البدايه زى النهايه
صبايا..... سبايا
فى بيوتهم مباعين
والبدايه
البدايه
غصن اخضر
وشاب اسمر
عارى الكتاف
يزرع...يزهر
يخضر. يعمر
يملى الضفاف
النهايه
دود وسوس
طايح يدوس
توبه الجفاف
بومه زاعقه
فوق شجره ناشفه
منها تخاف
والبومه تزعق الفين سنه
وغراب ينوح على حقنا
والحق ضايع
فى ارض المطامع
والضحيه كلنا
فى النهايه
هتكون البدايه
زى النهايه
زى اللى فات
انين سكات
خريف ممات
انسان فتات
فايض لنا
تعذبوها ..تعذبونى
تجلدوها تجلدونى
تحرقوها تحرقونى
صدقونى مش مهم
مش مهم

ابراهيم فايز

هناك 11 تعليقًا:

  1. قصيدة اكثر من رائعة جيفارا

    تسلم عليها

    مع خالص تحياتى

    ردحذف
  2. تسلم على القصيدةالجميله القديمة
    هههههههه
    مدونة مش يعنى مقال وبس
    يعنى قلم بيقول ويكتب ..شعر نثر ..صور
    مش مهم ...قصدى المهم أشعر اكثر وان شاء الله أحنتا وراك لحد ماتجيب اخرك

    فيه حاجة بقى أنا لاحظتها يوم (00 صلح الامريكانى.....هههههه "
    انت شاعر كويس ...لكن أكتشفت يومها أنك اخرك قصيدة قصيدتين ...وخلاص

    دى فرصه هنا كل اسبوع تكتبلنا قصيدة جديدة
    جديده لانج ...مش قديمة وتكتبهالنا تانى

    ردحذف
  3. انت عارف انا اخر مره كتبت شعر يمكن من اربع خمس سنين
    وده يرجع لأن ساعتها خدت عهد على نفسى انى مكتبش تانى
    يمكن حالة يأس يمكن حالة فلس
    يمكن عشان مفيش سمع وقعدات عشان كده القلم ملاه الصدأ
    يمكن حالة استسهال لأن المقال بالنسبه ليا اسهل شويه من كتابة قصيده
    وبرده المقال بئدر بيه اوصل الفكره اللى كنت عايز اقولها فى قصيده
    بس السبب الرئيسى فى عدم كتابة شعر واتخاذ العزم على كده انى لما جيت اكتب القصيده دى تحديدا قعدت اكتبها ييجى فى شهر على فكره هيا اطول من كده بكتير
    المهم لما كتبتها نشرتها فى منتدى
    التعليق بقى على القصيده كان اطول تعليق فيه
    احسنت نريد المزيد
    من ساعتها قلت اوف للشعر
    اون لأى حاجه تانيه
    واحد هيقولى انت بتكتب لنفسك
    هرد انا واقول حتى نفسى زهئت
    بس اوعدك
    ووعد رجاله
    انك هتقرالى جديد فى المدونه هنا
    شعر
    شعر بجد
    اوعدك مره تانيه
    وشكرا على مداخلتك

    ردحذف
  4. تسلم أيدك بجــد ... رائعة

    ردحذف
  5. محمد حجازي...
    بجد رائعة والأجمل الحرية في التعبير دون أي ضغوط ونحن في انتظار المزيد من ابداعاتك يا جيفارا..

    ردحذف
  6. تركيبت الكلمات لطيفة

    والكلام كله مع بعضه جميل

    تسلم ايدك

    ردحذف
  7. ما شاء الله عليك يا ابراهيم
    القصيدة أكثر من رائعة

    خالص تقديري لفكرك وقلمك

    ردحذف
  8. الله عليك
    شاعر مميز
    كلماتك في منتهى الابداع
    تحياتي

    ردحذف
  9. نقول قصيدة نقول خاطرة ...مش مهم
    الأهم الاحساس.

    ردحذف
  10. لا مهم ياريس...والله جميلة جدا

    ردحذف