Perfect World

من وانا صغير وانا بحلم بالـ بيرفكت وورلد ده كنت شفت فيلم اسمه كده بتاع كيفين كوستنر كانت اجمل حاجه عجبتنى فى الفيلم انه لما جاب الواد على كرسى وراح رابطه فوق سقف العربيه وراح فاتح بالعربيه يا معلم واديله على 130 (نفس لقطة جعلتنى مجرما لما رشدى اباظه اللى هو احمد حلمى ربط غاده عادل) ساعتها الموضوع عجبنى اوى حتى انا فاكر انى اتحايلت على خالى الأقطاعى الوحيد فى عيلتنا اللى كان عنده عربيه انه يربطنى على سقف العربيه وطبعا ساعتها خالى قالى على امك يابن المجنونه ومن ساعتها تكون عندى مفهوم عن خالى انه رخم وارخم من الرخامه ذاتها

المهم الموضوع ده قعد شاغلنى فتره كبيره اوى وكان نفسى اعمله انى اتربط فوق سقف عربيه والعربيه تطير بيا ولما كبرت شويه وعرفت ان فى ناس اغبيا ممكن تحقق امنيتك بس تربطك فى العربيه سحل يا معلم وتجرجر فى اللى جابوك تعمدت ان انسى تلك الامنيه الغريبه لكن ظلت هناك بعض من بقايا ذلك الموضوع يطاردنى وصارت هناك فى عقلى الكثير من الأسئله اللاسعه التى كانت ممكن تودينى فى داهيه وفـ سكة اللى يروح ميرجعش زى هو ليه ربنا خلق الذباب ؟ بالراحه بس ومن غير تريئه ولا شتيمه حد فيكو يقولى عن فايده وحيده للذباب غير انه رخم ورزل وابن ستين كلب خد بالك ان سؤال الذباب الجوهرى هذا لم يأت من فراغ فقد سبقته اسئله وعلى حسب المراحل العمريه مثل هو ليه ربنا خلق الناس الوحشه ؟ هو ربنا مش عارف ان الناس الوحشه دى بتعمل حاجات وحشه فى الناس الحلوه (حاجات وحشه بالمفهوم الحسن والسئ كمان ) هو ربنا مخلئش ليه كل الناس اغنياء ؟ وليه فى فقرا ؟ هو ربنا مخلئش الناس صوتها زى فيروز ليه اظن انا الطفل الوحيد فى الوطن العربى اللى عشقت فيروز من وانا عندى خمس سنين ساعتها لما سمعت فيروز قلت لخالى اجمل جمله اتقالت على فيروز ومن ساعتها وانا بقول عليها نفس الجمله (يا خاله الست دى بتغنى بجد)المهم كل مرحله عمريه وكان لها فيض الأسئله التى كانت تقودنى الى علقه محترمه فى النهايه او يجاوبنى عن اسئلتى خالى الرخم اللى كان بيستوعب شطحات اسئلتى بصبر شديد لدرجة انى شايف ان كتابة الشعر بالنسبه ليا الأن ما هى الا شكر وتقديرا له لأنه كان من كتاب الشعر الجامدين اوى

المهم لما كبرت واتأكد الجميع انى طلعت شاب ملك ومؤسس للرخامه فى العيلة بطل خالى يجاوبنى عن اسئلتى وابتديت ادور لنفسى عن اجابات

لقيت فى النهايه ان كل الأسئله دى اجابتها واحده بالرغم من تعددها هو الرغبه فى العالم المثالى او البيرفيكت وورلد اللى انا قلتلكم عليه وفضل موضوع الربط على سقف العربيه ده حلم بيراودنى

ومن فتره صغيره وعلى الطريق الدائرى واستغلالا للفلتان الأمنى وعدم وجود شرطه تسحلنى بنفس العربيه واستغلالا ايضا لوجود صديق مجنون معايا عملت الموضوع ده.....اه عملته وقعدت على سقف عربيه وعملت فيها تايتنك وطارت يا معلم العربيه وابتدى السويط هو مكنش سويط ولا صراخ من الخوف ابدا والله هو كان صراخ من النشوى تخيل انك تصل بالمتعه الى حد النشوى

انا معاك انه جنون بس ايه المشكله ماله الجنون انا كنت كتبت وقلت فى كام بيت شعر

الموت جنون

رقصة خشوع فى قلب المجون

لحظة تأمل فى صمت السكون

ولما تموت تكتشف

ان كل اللى انت كنت فيه

وخايف عليه

هو الجنون

ان تصل برغباتك الى حد النشوى فأنت قد استوعبت من رغباتك كل شئ دى هيا القضيه

تخيل معايا انك فى عالم مثالى

عالم مفيهوش ذباب عالم مفيهوش عاطف بتاع الأنابيب كل يوم ييجى ويصحيك من اجدعها نومه عالم مفيهوش فارس بتاع الزباله ابن الجزمه اللى بييجى ياخد الزباله الساعه 7 صباحا وساعات قبل كده عالم مفيهوش اغنيا ولا فقرا عالم مفيهوش حزب وطنى ولا جمال مبارك ولا احمد عز عالم مفيهوش فتحى سرور ولا صفوت الشريف

ها يا معلم اتخيلت ... طب تمام نكبر بمستوى الخيال شويه ونفلسفه

تخيل معايا بعالم احلامك فيه واقع عالم الحب فيه هو العمله الرسميه القابله للصرف عالم كله فيروز وخد بالك من التخيل ده تحديدا تخيل عالم كله الاصوات فيه صوت فيروز يااااااااااااااااااه

ها يا معلم ايه الأخبار انت سرحت ولا ايه خليك معايا

فى النهايه فى حقيقه غايبه عنى وعنك الا وهى

انك لو مسمعتش شعبان عبد الرحيم وشفيقه عمرك مكنت هتحس بصوت فيروز

انك لو معشتش لحظة كره مش هتحس بقيمة الحب اللى بين ايديك

اانك لو مصحيتش كل يوم على صوت عاطف بتاع الانابيب او فارس بتاع الزباله مكنتش هتتمنى ان ييجى عليك يوم وتصحى على صوت عصفوره او او صوت فيروزى

هيا دى المشكله مش هتحس بقيمة الشئ الا اذا كنت قد شعرت بضده

ورغما عن ذلك

ورغما عن تلك الحقيقه المؤلمه

سأظل احلم بعالم مثالى

عالم رغباتك فيه تصل بك الى النشوى

سأظل احلم بعالم الأحلام ..................

ابراهيم فايز