معروف ليا على الاقل ان المدونه ما هى الى مكان لطرح الانفعالات الى تنتاب كل منا
يعنى وببساطه اللى نفسك فيه اكتبه .
اللى ييجى على بالك دونه.
المدونه بتاعتك يا كبير ومحدش ليه عندنا حاجه.
طيب انا ذنب امى ايه كقارئ اخش اقرا تدوينه تقولى فيها ان سيادتك مكتئب
طب متكتئب ولا حتى تنتحر انا مالى هو انا يعنى ناقص كأآبة اهلك
ولاَ واحد تانى كاتبلى بوست طويل عريض يقولى ان حبيبته خبطته مفك فى راسه
وراحت ماشيه مع واحد تانى صاحب
ه انا مال اهلى طب هيا غاويه مشى وضرب مفكات
وهو راجل قمع بكل ما فى الكلمه من معنى واسقاط
خلاص يعنى بقى موضوع حبيبته ده موضوع قومى
ولابد علينا ان يدلو كل منا بدلوه فى ذلك الموضوع الحيوى الخطير
اه انا متفق ان المدونه حتى وان وصلت للعالميه فهى فى الأصل مكان شخصى
وان القارئ يأت ليشارك صاحب المدونه فى انفعالاته واتجهاته الشخصيه
لكن وخد بالك من كلمة لكن دى
بلاش نشخصن المواضيع زياده على اللزوم
يعنى مينفعش السلفيين يبقو ماسكين فى خناء بتوع الجماعه الأسلاميه وعمالين يعايروا فى بعض
بتاع الجماعه يقول للسلفى انت قلت ان المظاهرات حرام
والتمرد على الحاكم يصل الى الكفر
يروح السلفى قايله طب ماانت قلت ان الانتخابات حرام
وان الذى لا يحكم بشرع الله كافر ولا يجوز مشاركته
اسيب انا الخناءه دى واقول ان البت زلابيا نتشت الواد حمص مفك ومشيت مع الواد كريم طب ازاى؟؟؟
وتقولى المدونه مكان شخصى
طب متتكلم انت عن الموضوع ده بانطباعك الشخصى
قول اللى جواك ومن غير زعل
قول ان كتير بئو افاقين
يفعلون اقصى ما فى وسعهم للأستفاده من الموقف
وكأن الأسلام اصبح يطبق مبادئ ميكافييلى والتى اهمها مبدأ ان الغايه تبرر الوسيله
قول متتكسفش هيشتموك على النت
هتلاقى من اللى بيرد عليك فى مدونتك
سلفى ولا جهادى ولا قطبى ولا انصار سنه ولا تبليغ ولا جماعه اسلاميه
نسيت حد اه الاخوان الاخت الكبرى معلش
يا نهار ابيض مخطط كل دى جماعات كل دول بيختلفو بينهم وبين بعضهم
كل دول متفقين فى الاصل مختلفين فى الفروع او على الاقل بعضها
طب ازاى عايزينا نتفق معاهم
ده على اساس انهم كبار بيغلطو فى بعض وانت ملكش دعوه بيهم وعليك تسمع الكلام وخلاص
طب ايه رأيك ان اهم صفه فى الكبير هى الثبات على الموقف
بتاع الجماعه الأسلاميه لما ظبط السادات على المنصه اللى هما كانو جهاد فى الأصل يعنى
قالو ساعتها ان السادات من الكفار
ولما عملو المراجعات سمعت بودنى والله كرم زهدى على الجزيره وهو بيقول على السادات نحسبه عند الله من
الشهداء ....شهداء مين يا عم الحاج
قالو عن مجلس الشعب والانتخابات انها مجالس كفريه لأنها لا تطبق شرع الله
وأنه لا يجوز شرعا المشاركه فى اطار يحكم يغير ما انزل الله
طب الحال ايه دلوئتى اشمعنى دلوئتى دانتو كنتو ماسكين الأخوان مجرسينها وفضحينها فضيحة المطاهر
(الا بالحق تطلع ايه فضيحة المطاهر دى)
كل شويه يقولو للأخوان انتى تشاركى فى تطبيق منهج لا يحكم بغير ما انزل الله
ازاى يا اخوان تشاركى فى سن قوانين ليست بالهيه
المهم انا لما ناقشت واحد منهم قالى انها محاوله لتطبيق حكم الله لما ينجحو يعنى
رديت انا وقلت تبقو عالم نصابين وولاد كلب لأن البرنامج اللى انتو اتقدمتو بيه مفيهوش الكلام ده
ده برنامج علمانى زيه زى برنامج نجيب ساويرس بتاع المصريين الأحرار ومفرئش كتير
يبقى الناخب لما يروح ينتخبكم على كده وانتو تيجو وتغيرو كده تبقو عالم نصابين وضحكتو علينا
مش كده ولا ايه؟؟َ!
طب السلفيين لما قالو ان المشاركه فى المظاهرات حرام وفتنه
وان التمرد على الحاكم حتى لو ظالم من الكبائر التى لا تجوز
ده حتى واحد صاحبى قالى فتوى غريبه اوى ليهم لا أعلم متى صدقها وعلى فكره حاولت تبيان صدقها لكنى فشلت
الفتوى دى مفادها اجازة التعذيب لضابط مباحث امن الدوله من اجل سلامة البلاد وأمنها
وعلى فكره انا صدئتها ليه
اللى شاف فيكم السلفى ابو جبل وهو عمال يقول ان العقيد فلان بتاع مباحث امن الدوله اتصل بيا اصله صديق والضابط
فلان قالى مش عارف ايه ده انا حسيت انه بيسهر معاهم يا جدع ده مش بعيد يكونو واخدين بعض على حب
المهم بعد ده كله قالو نستفاد من الموقف وهوب طلعو عايزين كامليا ومن وراها عبيرولسه مايسه وانجى ورحمه
وعدو بقى اسامى مهو اى بت هتلاقى نفسها فاضيه
هتروح عامله الحوار ده والشعب كله هيهتف بأسمها
وهوب عايزين يخشو الانتخابات وهو بقت صناديق الانتخابات من اولى اهتماماتهم
لدرجة انهم قالو عليها غزوة الصناديق
ايه يا جدعان يا جدعان عيب مش كده
اللى عاجبنى فى الموضوع ده بتوع التبليغ والدعوه عمالين يعملو مظاهرات برجوع مباحث امن الدوله عشان مش
عارفين هياخدو التصاريح اللى كانو بياخدوها من مين بعد كده
انا عارف انى ممكن اتهاجم بالمقال ده وعارف انه مش هيعجب ناس كتير ابويا نفسه لما اتناقش معايا قالى جملتين
كل جمله كلمتين اول جمله انت مغفل تانى جمله انت علمانى وختم الجملتين بكلمة كلب
بس احنا اتفقنا او انتو اللى فهمتونى ان المدونه دى بتاعتك
وان انا دافع ايجار ميت سنه قدام
حتى المهندس سيد قالى اكتب يا حسين
متسيبش حاجه الا لما تكتبها يا حسين
ده حويط يا حسين
حصل ولا محصلشى يا هندسه
وانت يا هيثم مش انت اللى قلتلى اكتب اللى انت حاسه واللى انت عايزه
ادينى كتبت
وقلت...........
قلت ان الناس دى مش تمام او فاكرينا احنا اللى مش تمام
قلت ان الناس دى بقى كل اللى يهمها مصلحة الجماعه
وحتى وان كانت المصلحه تختلف مع مصلحة الوطن فمصلحة الجماعه هى الاولى
قلت ان الناس بتشتغلنا وفاكرينا بلاليص جمع بلاص
والبلاص هذا موطنه الصعيد وهناك فئة من الناس يريدون تعميم البلاص على مدار ارض الوطن
ليصبح الجميع بلاليص
فمن هنا انادى
عزيزى البلاص
عزيزتى البلاصه
الناس دى عايزه تبلبصنا
متسمعوش لحد
متمشوش ورا حد
كونو بلاليص بمزاجكو مش عشان هما عايزينكو تبقو بلاليص
حد فاهم حاجه
لو عليا كالعاده مش فاهم
انتهى
مستنى الشتيمه
ابراهيم فايز
بوست غريب نوعا ما ^_^
ردحذفلكن دعني أقول لك إن كل واحد له مطلق الحرية فيما يكتب طالما لا يتعرض للأديان السماوية ولا يقوم بالتجريح في اشخاص او فئات من الناس إذن هو حر
ثانيا أنا أو غيري ليس مضطراً أنه يفض خلاف بين شخصين أحدهما لا يفهم دينه والآخر يدعي الفهم , لن نستطيع أن نجبر الناس عن أي شئ تكتب
ثالثا نظرة كل واحد للمدونة بتختلف من شخص للتاني ولن نستطيع تحديد صفة أساسية للمدونة بأن نقول أنها موقع شخصي أكتب فيه ما أشاء أو موقع عام أناقش فيه مجريات الأحداث
أخي العزيز " أنت حر مالم تضر "
__________
Casper
صباح الغاردينيا
ردحذفومصافحة أولى لحرفك ومدونتك
كلاً منا له حق الكتابة كما يريد في مدونته فهي موقعه الشخصي حيث يجمع فيها كتاباته عن مشاعره او حتى مذكراته ..اما بالنسبة للزائر فله حق كتابة التعليق اولا فربما لم يعجبه ماطرحه الكاتب ..
لذلك تبقى النظرة للمدونة تختلف من شخص لأخر ..
؛؛
؛
:)
احييك على صدقك وعفويتك
؛؛
؛
لروحك عبق الغاردينيا
كانت هنا
reemaas
شوف ياصاحبى الكتابة هى حرية نفسية هكذا اسميها او اطلق عليها ولكل انسان حرية الكتابة فى ما يريد ولكن لايضهد او يشتم او يتحدث بطريقة غير محترمة مع الفكر المعارض لة
ردحذففلا يوجد احد يمتلك الحقيقية كاملة
مع خالص تحياتى
اسمح لى اتابع حضرتك :)
ردحذفياعمي أخبار زلابيا وكريم مطلوبة دلوقتي عشان اخبار السلفيين والجماعات بقت مقررة علينا يوميا...
ردحذفبوست عجيب جدا اختلف في اغلبه
ردحذفاولا المدونة مكان شخصي تكتب فيه خواطرك وافكاركولا يحق لاحد ان يسفه ما تكتب ويصفك بانك بعيد عن الحياة السياسية وما يحدث في البلد فما المجتمع الا اشخاص ان صلحوا وسمت ارواحهم صلح المجتمع بالتبعية
ثانيا تتكلم عن الاخوان والجماعات انا لست منهم ولا انتمي لطائفة منهم لكنني ارى انه من الديمقراطية ان يقولوا ما يقولوا وان كنت لم اسمع منهم اكثر الاشياء التي ذكرتها اراك متحاملا عليهم
الديمقراطية السليمة هي تقبل الآخر لا مهاجمته
تحياتي
صباح النضال
ردحذفجامدة جبت كل التناقضات بتاعتهم مرة واحدة ، و عمرهم ما هيتفقوا على حاجة ، لان كل واحد فيهم طمعان ياخد التورتة كلها لوحده مش عايز حد يشاركه فيها
أكتب براحتك أنت مصري حر
تسجيل حضور
ردحذفالله يعينكم..الفوضى هذه في الدول الاسلاميه كلها مو عندكم انتم بس
الله يحفظكم ويوفقكم
تحياتي
الفوضى عزيزى ابراهيم هى الأساس
ردحذففى ناس مستفيدة بالطبع من الفوضى دى وكل واحد بيدور على مصلحته الشخصية أولا
ربنا يصبرك ويصبرنا
اخواني البلاليص .. انتخبوني .. مرشحكم , اخوكم
ردحذفما احنا كلنا بلاليص زي بعض و اكيد هنفق جنب بعض
و بدل ما حد يملى البلاص جبنة قديمة .. انا هملاه عسل
.............
مستر جيفارا .. ابدعت كالعادة
هل هذه هي الفوضى الخلاقة ؟؟ ام انها منتهى السياسة ؟؟
مقال تهكمى بديع , و على فكرة هما اللى هيبقو بلاليص بعد كده .. و بكرة نشوف
أيه يا حسين ماحدش عاجبك يا حسين هههههه ..
ردحذففي البداية صباح الورد أيها الثائر
وفي الوسط هذه صفحتك ومن كامل حقك أن تكتب فيها ما
تريد دون التجريح بأحد إحتراماً لأخلاقيات التدوين و
مثم من حق الزائر التعليق على كلامك ولكن أيضاً دون
تجريح فهكذا ستكون مدونتك بالفعل منبر حوار حر
جميل لا كالجزيرة وأقصد بذلك تلك القناة الصاخبة
حد الصمم فأكتب يا حسين ماحدش هايلومك على أي
كلمة وخصوصاً أن جميع ما قلته صحيح بدرجة تبعث
الخوف في النفوس على مصر فحتى الآن لم أجد ذاك
الرجل أو المرأة الذين تقدموا لمنصب الرئيس وهو
شايل على أكتافه 80 مليون مصري فكل واحد فيهم
وضع نصب عينيه مجموعة مصالح خاصة ...
موضوع مهم يا جيفارا وبجد أسلوبك جميل
تحياتي
Casper & ريــــمــــاس
ردحذفالأفتتاحيه بتاعة البوست واللى هيا خاصه بنوع الكتابه اللى مفروض تبقى فى المنتدات
دى مجرد افتتاحيه
اما البوست نفسه بيناقش حاجه تانيه
يعنى نقدر نقول انها مجرد داخله للموضوع المراد
اشكركم بشده
وياريت متحرمونيش بردودكم ومروركم على المدونه
Ms Venus
ردحذفانا اللى برجوكى وباستئذنك انك تنورى المدونه
واسمع ارائك
شكرا على مرورك
تامر زى مقلت لكاسبر الموضوع بتاع الكتابه فى المدونه ده كان مجرد افتتاحيه وداخله لموضوع تاى
ردحذفاشكرك
وياريت متحرمنيش من مرورك وردودك
عزيزى مصطفى
ردحذفانا لست بمتحاملا عليهم
والله انا لما بنقدهم بيبقى نفسى انهم يكونو احسن الناس عشان يبقو صوره مشرفه للأسلام
لكن ما يحدث منهم يدعونى احيانا للجنون
وهديك امثله
فترة التسعينات والتخبط الكبير اللى حصل بين الجماعه الاسلاميه والحكومه اللى كانت نتيجته عمليات ارهابيه لا حصر لها
راح فيها شباب كتير من اللى كانو مقتنعين بأفكار الجماعه
ايه اللى تم النهارده المصالحات والمراجعات اللى حصلت بين الجماعه والحكومه واللى الجماعه قالت فى كتابها انها كانت على خطأ
طيب الشباب اللى راح نتيجة خطأهم ده ذنبه ايه
والكام طفله اللى ماتو فى العمليات دى
وقبل كده مقتل السادات
بقولك انا سمعت كرم زهدى وهو بيقول نحسبه عند الله من الشهداء
اما موضوع الانتخابات فحدث ولا حرج
وصل بيهم الامر انهم كانو بيكفرو اعضاء مجلس الشعب بل حتى اللى كانو بيروحو ينتخبو
وكان مبررهم الحكم بغير ما انزل الله
ودى كانت نقطة خلاف كبيره بين معظم الجماعات وجماعة الاخوان المسلمين
النهارده بقت الانتخابات حلال
والمشاركه فيها واجب دينى قبل ان يكون وطنى
الاخوان المسلمين
جماعه لها تأثيرها الواضح فى المجتمع وتواجد لا يغفل
لكن هناك من الامور التى تؤخذ عليهم
اذكرك بصفقة انتخابات الرئاسه السابقه
حينما امتنعو عن التصويت ونقضو العهد مع ايمن نور نظير خروج بعض كوادر الاخوان من المعتقلات
تلك الصفقه الجميع يعلمها ويعلم ابعادها
كما ان هناك مواقف يتوارى الاخوان منها ولا تجد لهم رأى محدد فيها
السلفيين
مع كامل احترامى وتقديرى
كانو من افضل الجماعات الموجوده على الساحه شئنا ام ابينا وذلك لاتخاذهم طريق الدعوه وخصوصا انهم اهل علم
لم يتدخلو فى امور السياسه او الحكم لا من قريب او من بعيد
جرمو المظاهرات ومنعوها فى اكثر من لقاء
اليوم منهم من سيرشح نفسه لرئاسة الجمهوريه ومجلس الشعب
انا لا اهاجمهم ولا امنع عنهم حق ديمقراطى فى المشاركه او التعبير
لكن ميوعة المواقف وعدم الثبات على فكر معين والتقلب الفكرى
كل هذه الامور هى التى جعلتهم عرضه للنقد
وجعلت من بعض الفئات يستغلون تلك المواقف فى غير الصالح
اشكر مرورك ولا تبخل عليابمرورك وردودك
عمرو
ردحذفسفيرة المحبه
المصالح الشخصيه حينما تطغى على مصلحة البلد
والفوضى حينما تصل للعقل
ومصير البلد حينما يتحول الى حسابات شخصيه
فكل من على الساحة باطل
اشكركم
فى انتظار تعليقاتكم
تركيب
ردحذفابشع انواع الحرب
هو تسفيه الفكر ودفع الناس الى اعتناق التفاهات والهزليات وترك امور البلاد ومصيرها
اشكرك على الرد وبلاش تبخل علينا بالتواجد
Foxology
ردحذفكما قلت سابقا وكما اشرت فى ردك
هناك من هم مستيفدين من اثارة الفوضى
انت جبت خلاصة الموضوع فى كلمتين
الله ينور عليك
احسنت
ريبال بيهس
ردحذفكل اللى هقلهولك ربنا يستر
ويعدى الايام دى على خير
بس ان شاء الله خير
أزال المؤلف هذا التعليق.
ردحذفجميل هي الصراحه وحريه الرأي.
ردحذفتقبلي مروري وتحياتي
احسنت
ردحذف