الخميس، 16 يونيو 2011

بحبك ------- أكرهك

بين الحب والكره

خط فاصل لكنه طويل بعض الشئ

وان كان الحب يقف على احدى ضفتى النهر

فالكره يقف مستندا الى شجرة الجميز العجوز اللى على الناحيه التانيه

وبغض النظر عن هذا او ذاك

فهناك مقوله سمعتها فى فيلم بتاع مين مش عارف

ومين اللى قالها مش فاكر والله برده ما عارف

المهم ان المقوله بتقول

(لو بتدور على الاسباب علشان تكره بيها حد هتكرهه)

(ولو بتدور على اسباب عشان تحب بيها نفس الشخص برد هتلاقى)

يعنى ببساطه وامعانا فى القول انت اللى بتقدر تحدد ان كنت عايز تحب ولا عايز تكره

المهم انك تركز افكارك فى توجيه مشاعرك نحو الشخص الاخر

حد فاهم حاجه؟؟

لو عليا كالعاده مش فاهم

طب ندى مثال

طب ندى مثال يمكن افهم

لعل وعسى

ابوك مثلا

تملك ان تحبه لانه هو اللى رباك وصرف عليك

وكان بيديك فلوس تشترى بيها اللى انت عاوزه

وهو برده اللى بيحل المشاكل اللى انت بتقع فيها

من الاخر دايما فى ضهرك

ساندك ومقويك

وفى نفس الوقت انت تملك ان تكرهه

لانه هو اللى بيعاقبك لما بتغلط

وممكن يلطشك كام قلم كده على الماشى

وممكن يمنع عنك المصروف

وتبقى ماشى مع اصحابك شريد وحيد وجيوبك على الحديد

وهو برده اللى بتلاقيه هارش التيته وأآفش وقفة البلكونه لبنت الجيران

وميحلالوش المعايره بأنه هو اللى بيشترليك الأندر وير الا قدامها

مثال كمان

التعليم ان كنت فى المدرسه ولا فى الكليه اللى اتعلمت فيها لحد مبقيت حاجه

واذا ما كنتش لسه حاجه لحد دلوقتى

لازم اقلك معلش استحمل بكره هتبقى حاجه

احنا كلنا( اللى بقينا حاجه) بدأنا من الصفر

والحمد لله وصلنا اهو لصفر غير الصفر الاولانى وربنا يسهل

بس قول يارب

المهم انت ممكن تكره المدرسه او الكليه

ويبقى المدرس او الدكتور عامل زى الاشكيف اللى كان فى فوازير رمضان

فاكرينه اللى كان مع المناضله شريهان

لانك ياما انضربت فى المدرسه بسبب ومن غير سبب

وممكن برده يكون الدكتور اياها وقفك ومسح بكرامتك بلاط المدرج

والا بقى يا معلم لو حظك كان فى كلية تجاره ولا حقوق

هيبقى اللى شاف فضيحتك مئات ومش بعيد تلاقيها فى حصاد الاسبوع بتاع الجزيره

وومكن برده يكون الدكتور نفسه والمدرس ذاته قدوه ليك ومثال لطموحك

ده ان كنت من اصحاب الطموح اصلا

لانه علمك وفهمك ومن يعلمك حرفا لابد وان تصير له.......

(الشق التانى من ظرية فيثاغورث اللى بتلاقيها مكتوبه على كل حيطان المدرسه)

وغيره وغيره من العلاقات الكثيره

وغيره وغيره من الامثله

التى تضطرب فيها المشاعر مابين الحب والكره ما بين الابيض والاسود

اذن وخد بالك من النون بتاعة اذن دى

اذن يبقى علينا ان نحتفظ بالحب الابيض لحد ما ييجى اليوم الاسود

يعنى هل معنى كلامى ان اللى يكرتنى كف محترم على افايا ادوب فيه عشقا

لا مش قصدى كده

انا قصدى انك ساعتها متلبسكش روح الانتقام بتاعة انور وجدى فى فيلم حسن الهلالى

خد حقك بس بالمعقول يا معلم

بلاش تعملى فيها محمود المليجى

ويكون الشر والكره عندك هوايه

حد فاهم حاجه

لو عليا كالعاده

فهمت

بس هعمل نفسى مش فاهم

وشكرن

ومتاخدش بالك من النون دى اللى فى شكرن

الى ان نلتقى

هناك 17 تعليقًا:

  1. هههههه شديد قناوي...الظاهر ان حكاية المعايرة بالاندوير دي تراث شعبي مصري....بس حلاوتها بالعامية يا معلم....حلو كلامك وسلس ...وكدة نحبك مع ان اللون الازرق واجع عنينا بس على رايك الحب والكره في ايدينا .وشكرن...

    ردحذف
  2. لو بأيدى هلغى اللون الازرق ده من قائمة الالوان
    اوعدك انى هغير اللون ده خالص
    بالنسبه لموضوع التراث الشعبى المصرى التراث ده مليان زى جراب الحاوى
    شكرا على مرورك وردك

    ردحذف
  3. الحب والكره بأيدينا؟
    امممم!!يمكن يجوز جايز
    بس أعتقد ان دى مشاعر
    طبيعية ليس لنا فيها دخل:)

    ردحذف
  4. جيفارا
    شوف ... أنا متفق معاك ... بجد ... حاسس أنك مش مصدق ... طيب والعيش والملح ... متفق معاك ... !
    فعلاً ... رؤيتك للأحداث والناس والمواقف هيه اللى بتحدد أنت واقف فين ... موقف دمياط ... ولا موقف المنصورة ...!
    جزءكبير جداً من حلاوة أو وحاشة العالم فى عنينا لينا دخل كبير فيها ... نابع من نظرتنا تجاهه ... حد فاهم حاجة ... انا عن نفسى زيك بالظبط ... !
    تحياتى
    بالمناسبة ... أنت دمك خفيف
    بالمناسبة بردوا كنت عايزك تقرا الكتاب الالكترونى بتاعى وتقولى رأيك ... رأيك يهمنى ...!
    خللى بالك انا مبطلبش الطلب ده من اى حد الا لما بتعجبنى نضافة دماغه ... يا سلام على نضافة دماغك يا عبد الستار ...!
    تحياتى

    ردحذف
  5. بوست جميل وفكرته في منتهى الجمال والروعة
    تحياتي

    ردحذف
  6. انا معاكى ان الحب والكره ده حاجه طبيعيه مش وبايدينا بس انا قصدى بلاس نكره بعنف وبرده بلاش نبقى مصدرين الكره وجاهزين بيه بلاش نتمادى فى الانتقام مثلا
    الحمد لله يا هندسه ان دماغى عجباك بجد ده شرف ليا والحمد لله انك برده متفق معايا
    فعلا نظرتنا للحدث هيا اللى بتحدد موقفنا منه
    بالنسبه لكتابك هرد عليك قريب وقلك رأيى
    انا هحمله حالا
    مصطفى شكرا لاهتمامك ومرورك

    ردحذف
  7. هى كيميا بالتأكيد ودايما بنربطها بالمواقف زى الأمثلة اللى قلتها

    الخيط الرفيع هو المشكلة وخللى بالك من التاء فى مشكلة دى :))

    تدوينة جميلة تشغل الدماغ ع الصبح كدة :)

    تحياتى

    ردحذف
  8. احنا اللي بنصنع الحب والكره بأيدينا وبنحدد طبيعة علاقتنا بالاخرين حسب حالاتنا النفسية ومزاجيتنا ..

    سعيدة بعثوري على مدونتك وان شاء الله من المتابعين لكل جديد ..

    دمت بخير وتقبل خالص تحيتي وتقديري.

    ردحذف
  9. والله انا مش مصدء مروركم وردودكم دى بجد انا مكنتش متوقع الردود دى كلها
    اشكر كل فرد مر وقرأ كلماتى ورد
    بجد الف الف شكر ليكم جميعا
    اعدكم ببذل المجهود والجديد دائما

    ردحذف
  10. كلام جميل اوى يا ابراهم بجد احنا اللى بأدينا نحب ونكره نشتغل او نبئه سكليه الواحد فى ايدى كل حاجه بس هوا اللى بيحب يعمل فيها ابو العريف ويمشيها على مزاجو وممكن لو حرام يحللها لنفسو
    كلام جميل جدا يا ابراهيم مش لاقى كلام اعبر بيه عن حلاوته وصدقه فى الحياه

    ردحذف
  11. كل واحد من البشر ليه وجه مضىء محبوب و وجه مظلم مكروهفإذا نظرنا على الجانب المضىء سوف ينعكس النور عليناويضى الجزء المظلم عندناو بكدا لو حاولنا نحب غيرنا لحاجة حلوة فيه مش هيبأة فيه حاجة وحشه فينا لحد يكرها

    ردحذف
  12. مبروك عليك ظهور المدونة فى ريدر " بيت المدونين "
    ننتظر المزيد

    ردحذف
  13. الله يبار فيك
    انا مش عارف اقول ايه بجد
    انا ابتديت فى التدوين سنة 2008 وكنش حد حتى بيشتمنى فى رد
    حتى كنت بفكر اغير اسمها واسميها القناه الاولى بالتليفزيون المصرى بما ان محدش بيخش ولا بيقرا ولا بيشوف
    جه هيثم كيلانى وخد بأيدى تانى وفتحلى باب التدوين ودخلنى
    ومن خلال ردى ده انا بقدمله الشكر والتحيه على اللى قدمه ليا من مساعده وصبر عليا
    وبرده بقدملكو كلكم التحيه والشكر على ردودكم اللى اصبحت بالنسبه ليا حافز يدفعنى للأمام وتذكيرى بأن هناك اناس مازالو مصممين على القرأه
    فى النهايه
    الف مليون شكر
    بجد الف شكر

    ردحذف
  14. صباح الخير جيفارا

    بالفعل نستطيع أن نحب وأن نكره ولكن عند

    الإسائة نحتاج لمجهود جبار حتى لا يغلب الكره

    الكره والحقد علينا لدرجة نتمنى معها موت

    لمن أساء لنا لأن هذه هي طبيعة البشر ولا

    نستطيع التحكم بها مهما بلغنا من قوة إنما

    تحتاج سمو روحي يصل إليها البعض عبر التدريب

    المستمر ...

    موضوع رائع ومهم ويحتاج لوقفات جادة منا

    تحياتي

    ردحذف
  15. السلام عليكم ورحمة الله وبركاته
    بص ديه أول زيارة وأول تعليق فى مدونتك اللطيفة ديه ومش عايزة حد يقول ديه داخلة تعطينا مواعظ أنا ح أكتب اللى أنا مقتنعة بيه عن تجربة وإيمان .. فى حديث شريف يلخص الموضوع ويريح الجميع وأنا جربته
    قال رسول الله صلى الله عليه وسلم (من أحب لله وأبغض لله وأعطى لله ومنع لله فقد استكمل الإيمان) او كما قال صلى الله عليه وسلم .. يعنى أسباب الحب والكره لازم تنبنى على أسس موضوعيه تتعلق بأعمال الشخص وأقواله .. أنا مثلا أحب هذا الشخص لأنه يتقى الله ويحاول إرضاءه وأبغض هذا لأنه لا يعظم شعائر الله وهكذا ياريت نجرب كلنا نطبق الحديث ده فى علاقتنا ح نستريح كثير
    تحياتى

    ردحذف
  16. شكرننننن لك يا أستاذ جيفارا لقد كشفتني امام نفسي واثبت علي ان العيب يكمن فينا وشكرا لأسلوبك اللذيذ في عرض الموضوع فأنا كنت اقرأ وأتمني الا افرغ من اتلقراءة ....محمد الشيمي

    ردحذف